بیٹیاں پھول ہوتی ہیں۔ اللہ کی رحمت ہوتی ہیں۔ ان سے محبت اور شفقت سے پیش آنا بہت ضروری اس لئے بھی ہے کہ ہمارے معاشرے میں ایسے لوگ بھی ہیں جو بیٹیوں کے حقوق کے معاملے میں بالکل ان پڑھ ہیں‘ انہیں کچھ معلوم نہیں۔ اس کے باوجود اپنے مردانہ وار کام سے دنیا بھر میں اپنے وطن کا نام روشن اور سبز ہلالی پرچم بلند کرنے والی پاکستانی مائوں اور بیٹیوں کی کمی نہیں۔تاریخ اسلام اور پاکستان میں ایسی بے شمار بیٹیاں ہیں جو اپنے کردار اور عمل سے رہتی دنیا تک کے لیے خود کو امر کرچکی ہیں۔ دین اسلام کی چادر اوڑھ کر شریعت کے مطابق زندگی گزاریں۔ ایسی خواتین کامیاب بھی ہوتی ہیں جو رشتوں کے تقدس کو برقرار رکھ کر اپنی شناخت خود بناتی ہیں۔ جب ہم بیٹی کو ماں کا پرتو اور ماں کو اس کی پرچھائیں کہتے ہیں تو واضح ہے۔ یہ رشتہ شرینی میں گندھ کر ماں اور بیٹی کے تعلقات کو وضع کرتا ہے۔ زندگی ختم بھی ہو جائے تب بھی یہ محبت، یہ التفات اور روحانی تعلق سدا استوار رہتا ہے۔